الخميس، 26 يوليو 2007

تاني .... من يغلق معبر رفح؟؟

لم أكن أتوقع أن موضوع البوست السابق (من يغلق معبر رفح؟ ) سوف يثير هذا الكم من التعليق سواء علي البوست نفسه أم من خلال الميل الخاص بي ... خاصة و أن مدونتي لم تكمل شهر و كنت أعتقد أن لا أحد يعرفها أو يقرأها غيري ... و كنت أعتبر أنني أكلم نفسي فيها ... بل أنني لم أخبر أصدقائي و أهلي بها ... و تركتها لمن يجدها بالصدفة
المهم من أرسل لي علي الميل رددت عليه علي الميل ... و من ترك تعليق ... رددت عليه بتعليق و المعملة بالمثل
و كم سعدت بأن هناك شباب مثقف واعد مهتم علي درجة عاليه من الأدب في الحوار ... صحيح عددهم مش كثير مقارنة بشباب لجأوا للشتيمة و التهكم و طبعا موجود تعليق علي البوست اللي فات ممكن تشوفوه بيتهمني بالفاشية و عموما عهد مني لن لأمنع تعليق و لن أفعل المودريشن و لن أهمل رأي و لن أرد علي الشتيمة بالمثل فالحوار ثم الحوار هو الحل لكل مشاكلنا و عهد أيضا لو أي إنسان أقنعني إني غلطان سأعلن أني غلطان أمام الجميع... المهم وجدت الكثيرين يرددون ... مصر هي اللي قافله المعبر؟؟ مش عارف إزاي ... مع إن مصر تتحكم في منفذ واحد بس للمعبر و لا تتحكم في الناحية التانية
لنعود لموضوعنا ... عايز أقول لكم أنني لا أدافع عن النظام المصري ... فأنا لست منتمي لأي حزب أو جماعة محظورة أو غير محظورة بالرغم أنني مواطن عادي عايش هموم وطنه و يمكن كان لي الحظ بالعيش بعض الوقت في أوروبا فتعلمت منهم ( و ليس عيبا أن نتعلم من الآخرين و لو إختلفنا معهم) أقول تعلمت منهم الحوار و إحترام الآخر .... و هنا أقول أن الفهم الحقيقي للديمقراطية لا زال بعيدا سواء عن حكامنا أو شعبنا ... فاليوم الذي نقول فيه أن الشعب و المعارضة منه بالذات يفهم الديمقراطية هو اليوم الذي نري فيه من يدافع عن النظام لا يتهم بأنه عميل نفعي للنظام بل يناقش موضوعيا فيما يقول و اليوم الذي نقول فيه أن النظام يفهم الديمقراطية هو اليوم الذي نري فيه من يعارض النظام لا يتهم بالعماله للخارج أو محاوله تهديد السلام الإجتماعي بل أيضا يناقش موضوعيا فيما يقول .... و طبعا واضح أن كلا من المعارضة و النظام بعيدان حتي الآن كل البعد عن الفهم الصحيح للديقراطية
الموضوع مش مين صوته عالي ... و لا مين لسانه طويل .... الموضوع مين حجته مقنعة و لازم الكل يعمل لمصلحة البلد
طبعا أنا مقتنع أن النظام المصري ليس من مصلحته مطلقا حدوث مثل هذه المشكلة علي حدوده الشرقية و هو يعلم أن الشعب المصري متعاطف مع الشعب الفلسطيني خاصة أهل سيناء و أهل غزة لأن فيه بينهم تجارة و روابط عائلية و نسب و الشعور القبلي في هذه المناطق كل العالم بيعمل له مليون حساب و من المعلوم أن ردود الأفعال العاطفية لا يمكن التحكم بمجرياتها ... فهل يجازف النظام المصري بالأمن القومي بإغلاق المعبر و ما الفائدة التي ستعود عليه ... لو كان هناك مطلوبين للنظام المصري من العالقين علي المعبر ... العملية بسيطة يقدر يطلعهم و يعمل فيهم اللي هوة عايزة ....يا جماعة إستمرار المشكلة تهدد الأمن القومي المصري و زي ما قلت مصر طلبت فتح و لو مؤقت للمعبر و لم يقبل طلبها.... بدال ما نتهم النظام المصري كده و خلاص و نساعد في إختفاء المسئول الأصلي تعالوا نفكر بعقل و نكشف المسئول الأصلي و المستفيد الرئيسي إن لم نقل الوحيد من هذا الغلق .... و بعدين كلنا نفضحة و نجرسة ونفرج الدنيا عليه و نكشفة للناس
تعالوا مع بعض نقرأ الخبر ده
إيه رأيكم بس ياريت نتتبع الرابط و نقرأ الخبر كله علشان نفهم إن الراجل ده بقي بيتفق مع إسرائيل علي شعبه بدعوي محاصرة
عايز يقطع عنهم النور ....
يعني عايزها ضلمة ...
علشان الخفافيش اللي زيه لا يتحملوا النور....
و هنا هل لنا أن نسأل
المستشفيات هاتشتغل إزاي من غير نور يافالح
المصانع هاتشتغل إزاي من غير نور ياعبقري
كيف يعيش الناس من غير وقود... يازعيم
هل هذه تصرفات قائد همه مصلحة شعبه .... حد يرد علي.... طب أنا فاشي متعفن ..... ده تسموه إيه؟؟؟؟؟؟؟؟؟؟
إستنوا تعالوا نكمل قراية الخبر

ياريت ناخد بالنا من الجزء الأحمر و طبعا لو قرينا الخبر من مصدره نعرف إن الخبر نقله المركز الفلسطيني للإعلام و المصادر المشار إليها مصادر في السلطة الفلسطينية ذاتها.... عباس بيصاحب أولمرت و بيستعين به علي حماس و بيعذب الشعب اللي إنتخب حماس .... يا تري أنا فاهم غلط و لا الفاشية بتاعتي مأثرة علي فهمي ؟؟؟؟
هذا الرجل يستعدي العالم علي شعبه و اللي مش مصدقني يشوف .... طبعا عباس و رجاله واعيين و مفتحيين قوي للي بيحصل حواليهم حتي أن عباس جاب خبر فشلت المخابرات الأمريكية و الإسرائيلية و الأوروبية و العالمية في الحصول عليه و كان له السبق في كشف المستور و هو أن حماس أدخلت تنظيم القاعدة إلي غزة ..... ما تستغربوش الكلام ده مش من عندي .... الكلام ده قاله في بذات نفسيته في مقابلة مع التيفزيون الإيطالي عبقري زمانه
قال رئيس السلطة الوطنية الفلسطينية محمود عباس (أبومازن) إن حركة المقاومة الإسلامية حماس, التي تسيطر على قطاع غزة, تحمي تنظيم "القاعدة" وتتيح له الحصول على موطئ قدم في القطاع।
و طبعا كلنا عارفين حساسية الغرب تجاه تنظيم القاعدة.... ياتري الراجل ده عارف بيعمل إيه و لا مش واخد باله
ده مش عايزها ضلمة بس
ده عايزها والعة حريقة
الراجل ده عايز يولع في بلده
ياتري أنا فاهم صح و لا الفاشية مغمضة عيني ... بدال ما نتهم مصر بغلق المعبر ... و نسيب صاحبنا مستخبي يلعب في الضلمة تعالوا نولع النور و نكشفة و نوري الناس مين قافل المعبر و عايز يولع شعبه
و طبعا أصحابنا إياهم مش هايسيبوا الموضوع يعدي كده .... لازم يطلعوا مستفيدين .... و ده هايكون موضوعنا اللي جاي لو كان في العمر بقية
أنا هنا .... مرحبا بالهجوم علي ... و الشتيمة ماتزعلنيش ... و لا أرد عليها بالمثل

الاثنين، 23 يوليو 2007

من يغلق معبر رفح؟

قال النبي صلي الله عليه و سلم
"أنصر أخاك ظالما أو مظلوما "
فلما سئل
"ننصره مظلوما ... فكيف ننصره ظالما"
قال صلي الله عليه وسلم
"بأن ترده إلي الحق"
صدق الرسول الكريم صلي الله عليه وسلم
و كما نفهم من الحديث الكريم يجب ألا تعارض علي طول الخط لمجرد المعارضه و حسب فيمكن أن أتفق معك في كثير من الأمور و أختلف معك في بعض الأمور و بالعكس من الممكن أن أختلف معك علي كثير من الأمور و أتفق معك في بعض الأمور .... أي أن قضية الإتفاق و الإختلاف تكون موضوعية ... و ذلك تطبيقا لمقولة المسطرة و الميزان ... فيجب توحيد القياس و الوزن حتي تكون المتابعة و المقارنة موضوعية و سليمة و لا نكيل بعدة مكاييل و لا نكون كما يقول المثل الشعبي المصري الشهير
حبيبك يمضغ لك الزلط ... و عدوك يتمني لك الغلط
كانت هذه المقدمة لا بد منها في هذا الموضوع المهم و الحيوي ... فتضحيات مصر من أجل القضية الفلسطينية لا تحصي و لا تعد و لا يمكن المزايدة عليها ... فمصر بالرغم من مشاكلها المادية الكثيرة قدمت و تقدم الكثير من أجل هذه القضية و ما قدمته لم تقدمه و لا حتي جزء يسير منه دول عربية و إسلامية غنية ترغد في رفاهية العيش و فقط تجاهد بالكلمات
و لنعود لموضوعنا
من يغلق معبر رفح؟
هل مصر ؟ أم إسرائيل؟ أم محمود عباس و سلطته؟
لو تابعنا التقرير التالي قد يساعنا بعض الشئ في الإجابة
و قد تابعت وكالات الأنباء العالمية أن إسرائيل لا تمانع في فتح المعبر بإشراف دولي أو محايد و أيضا أعلنت حماس صراحة أنها لا تمانع في فتح المعبر بل أعلنت أنها أيضا لا تمانع في إشراف أي جهة علي المعبر حتي أنها قالت أنها لا تمانع لو إنشئت شركات من القطاع الخاص لإدارة المعابر
الإعتراض الوحيد الذي إعلن عنه أن محمود عباس هو الذي يعارض في فتح المعبر حتي لا يدخل أنصار حماس إلي القطاع و هو يريد أن يستعمل الفلسطينيون معبر كرم أبو سالم بدلا منه و هو المعبر الذي تسيطر عليه إسرائيل بالكامل و ذلك حتي تتمكن إسرائيل من فحص الداخلين و الخارجين حسب رؤيتها فتسمح بالمرور لمن تشاء و تمنع من تشاء و تعتقل من تشاء هذه فلسفة الرجل فهو يضحي بسلامة مواطنية و يثق في إسرائيل أكثر من ثقته في أي أحد آخر و إسرائيل أصبحت أقرب إلي قلبه من حماس أو أي طرف آخر
و قد تناقلت وكالات الأنباء أن مصر حاولت فتح المعبر حتي و لو لفترة لإنهاء مشكلة العالقين أو الحالات الإنسانية منها و يمكننا متابعة التقرير التالي
"ذكرت مصادر فلسطينية أن الحكومةالإسرائيلية لم توافق على طلب مصري لحل أزمة العالقين على معبر رفح الحدودي عبر فتح المعبر لمدة ثمان وأربعين ساعة لإدخال حالات استثنائية إلى قطاع غزة."
http://www.masrawy.com/news/2007/egypt/politics/july/22/rafah.aspx
اي أن مصر تحاول فتح المعبر و لو لفترة و لكنها تملك أحد طرفيه و ليس الطرفان و من يملك الطرف الآخر هو الذي يرفض بإيعاذ من محمود عباس و بطانته الذي له مصلحة مباشرة في إستمرار غلق المعبر و ليمت من يموت و ليذهب للجحيم كل من لا يسير في ركابه أو يحصل علي خاتم البركة منه ... أليس هو رئيس السلطة الشرعية ... المحشية
لماذا الإشارة إلي أن مصر السبب في غلق المعبر ؟
إستطلاع غريب و مشبوه قرأته علي الجزيرة نت مفاده "هل تؤيد إستمرار السلطات المصرية إغلاق معبر رفح" و طبعا نتيجة الإستطلاع الأغلبية لا تؤيد


طبعا أنا بأتابع الجزيرة سواء القناة الفضائية أو الجزيرة نت و اتفق معها في الكثير لكن عندما يصل الأمر إلي هذا السفور أقول لا لألألأ ...... للأسباب التالية
أولا : واضح سوء نية الإستطلاع و عندما يصل الأمر لمصر نقول لالالالا
ثانيا : كان يمكن أن تكون صيغة الإستطلاع
"هل تؤيد إستمرار إغلاق معبر رفح "
دون الإشارة للسلطات المصرية
ثالثا : كان يمكن أن تكون صيغة الإستطلاع
" هل تؤيد إستمرار إسرائيل إغلاق معبر رفح "
لأنها تملك التحكم في الطرف الثاني للمعبر
رابعا : كان يمكن أن تكون صيغة الإستطلاع
" هل تؤيد إستمرار السلطة الفلسطينية ممثلة في عباس و رجاله إغلاق معبر رفح "
علي أساس أنه هو الذي أوعز لإسرائيل بذلك
خامسا : كان يمكن أن تكون صيغة الإستطلاع
" هل تؤيد إنسحاب الأوربيين من الإشراف علي معبر رفح "
لأنهم و حسب إتفاقية المعبر هم المعنيين بالإشراف عليه
سادسا : كان يمكن أن تكون صيغة الإستطلاع
"هل تؤيد إستخدام الفلسطينيون لمعبر كرم أبو سالم بدلا من معبر رفح"
علي أساس أن معبر كرم أبو سالم تحت السيطرة الإسرائيلية الكاملة
أما الإستطلاع بهذا الشكل الفج فهو أكيد له أهداف غير وطنية و مهما كانت مشاعر المصريين المتعاطفة مع إخوانهم الفلسطينيون فعندما يصل الأمر لمصر نقول لالالالا
************
هل نسينا عندما شكلت حماس الحكومة و تم عقاب الشعب الفلسطيني لأنه إنتخبها بفرض الحصار الإقتصادي عليه و بتعليمات من أمريكا توقفت البنوك حتي العربية منها عن تحويل الأموال للشعب الفلسطيني و كان قيادات حماس يلجأون لتهريب الأموال و المعونات و التبرعات المالية في شنط برفقتهم
ألم يكونوا يمرون بأموالهم من معبر رفح؟
ألم تسمح لهم السلطات المصرية بل ساعدت و لو بغض الطرف
بإدخال الأموال لمساعدة الشعب الفلسطيني؟
هل تم إعلان القبض علي أحدهم بتهمة تهريب الأموال
علي الجانب المصري من المعبر؟
ألم يكن كل من ضبط و بحوزته الأموال
تم ضبطة علي الجانب الفلسطيني من المعبر؟
ألم يكن من قام بالضبط و المصادرة
هم رجال عباس و حرسة و تابعية؟
هل ننسي أن مصر لم تنكر مرور الأموال مبررة ذلك
بأن القانون المصري لا يمنع خروج الأموال؟
ألم يكن من حرم الشعب الفلسطيني من تدفق المال
و أغلق هذا الباب هم رجال عباس ؟
لماذا لم نري إستطلاعات عن هذا الأمر؟
**********
لالالا ياجزيرة نت
هل يمكن تبرئة الجميع ؟
و إختصار المشكلة في السلطات المصرية؟
تلبس لوحدها القضية؟
و هي الوحيدة التي ليس لها مساهمة في حدوثها أو إستمرارها
بل وحدها تتحمل وزر الآخرين
دور مصر لا يحدده إستطلاع مشبوه
لا تقربوا مصر .... تسلموا
إلا مصر .... إلا مصر
مصر خط أحمر عريض قوي
الكبير ... كبير
مهما فعل الصغار
**********
دعوة مفتوحة لكل المدونين
علي إختلاف ميولهم و إنتمائاتهم
"إنصروا مصركم"

السبت، 14 يوليو 2007

العالقون علي المعبر



مين كان يصدق في يوم من الأيام يشوف المنظر ده بعينية ..... فين ..... في مصر ...... البلد اللي من النادر تلاقي فيه بيت مفيهوش شهيد لقي ربه و هو بيدافع عننا و بيحارب الصهاينة ..... ياتري ده حلم و لا علم ...... العلمين جنب بعض .... لكن ولاد الكلب (طبعا ولاد الكلب دي فيها معاداة سامية - السامية مش البت ساميه - ياعم قكك و لا يهمك سامية و لا بامية ) حاطين علمهم علي حته أرض أعلي من علمنا .... و إحنا مكبرين .... ياعم فكك من دي مظاهر كدابه .... يا جماعة العلم ده مات علشانه ناس كثير .... لازم نبقي أوعي من كده شوية..... عموما ده حالنا ..و برغم الإتفاقات الأرض دي أرضنا و الأرض هاتفضل بإذن الله أرضنا لغاية ما يتولد فينا صلاح الدين تاني ... و ربنا يبعت الفرج من عنده .... علشان الألم اللي بيحس بيه كل اللي بيشوف المنظر ده يروح


أما المنظر ده منظر العالقين علي المعبر بين غزة و مصر و تسمية العالقين دي مش عارف جت منين لكن أهم بيقولوا العالقين يمكن يقصدوا محشورين أو مزنوقين ..... يمكن .... الناس دول ياجماعة بالمئات و يمكن آلاف كانوا بيقضوا مصالح برة غزة منهم اللي كان بيتعالج .... و منهم الطالب اللي بيدرس ... و منهم اللي كان بيزور قرايبة .. أو حتي بيتفسح و لما جم يروحوا تاني إتحشروا في المعبر

دلوقتي همة عالقين أو محشورين

و المعبر مقفول

و مصر رفضت إنهم يرجعوا

و إسرائيل رفضت تدخلهم إلا من المعبر بتاعها

طب ليه .... ده فيهم ناس عيانين .... وناس ماتت

و ناس بتموت

قالك الموت علينا حق و ده عمرهم

قالك علشان يعرفوا حماس عملت لهم إيه

طب ياروح ما بعدك روح نهد السور و نعدي

قالك نزود الحراسة علي السور

إنتوا بتعاقبوا مين

كده مش بتعاقبوا حماس

كده بتزودوا شعبيتها يا هبل يا عبط

الناس هاتكرهكوا إنتوا

مفيش فايدة

في الصحراء القاحلة

إستنوا قضي ربنا

أنا حطيت البوست ده في القسم الخاص بالحرية مع إن المفروض يكون في السياسة لكن قصدي أقول إن من ضمن حقوق الإنسان اللي حطتها الأمم المتحدة حق التنقل و ياسلام لما يكون حق العودة للوطن ..... يا عالم الناس دي تعبت كفاية

يعني دول لو كانوا أي جنسية تانية ما كانتش الدنيا إتقلبت و جت طيارات المساعدات و زادت الضغوط الدوليه حتي يعودا لبلادهم ده أحنا بنشوف الدنيا بتتقلب برة علي كلب و لا قطة مزنوقين .... هما دول مش بني أدمين .... فيهم مسلمين و فيهم مسيحيين

أي نعم لكنهم عرب ..... يستاهلوا

ألا نامت أعين الجبناء

رحماك ربي

البنات دول وحشين

بصوا لصورة البنات دول
أرجوكم لا تنخدعوا مثلي في البنات دول
أوعوا تقولوا
بنات قمامير زي الملايكة
دول طلعوا شياطين مسلسلة
بنات بجحة متربتش
أهلهم معلموهمش الصح و الغلط
إرهابيات ... متخلفات.... رجعيات
سافلات .... منحطات .... وحشات
يهددن كل قيم العلمانية التي ينعم بيها العالم
آل إية السفلة ولاد السفلة
ببجاحة (بعيد عن السامعين) بيقولوا
سيحافظن علي عذريتهن و لن يمارسن الجنس قبل الزواج
يانهار إسود و منيل بنيلة شايلة نيلة
يعني إيه الكلام دة
بقي دول برضه لهم أهل ربوهم
و علموهم الصح و الغلط
يعني إيه يا بنت منك لها
تحافظي علي العذرية
و لن تمارسي الجنس قبل الزواج
عذرية إيه و زواج إيه يا مفعوصة منك لها
و الأكادة و البجاحة
حاطين خواتم في إيديهم ترمز إلي عدم ممارسة الجنس قبل الزواج
لألألألألألألألألألألأ بجاحة بصحيح
طبعا المدرسة بتاعتهم لازم تحمي باقي البنات
علشان العدوي( الفكرة) لا تتحول إلي دعوة
راحت فاصلة البنات المشاغبات الوحشات دول
قوم إية البجاحة تخليهم بدال ما يتكسفوا
و يداروا عارهم و يغطوا خيبتهم بميت برش
لأ ... و ببجاحة
يرفعوا قضية علي المدرسة
..........
طب إحنا مع العلمانية بنسأل
مش زي البنت ما هي حرة
تمارس الجنس قبل الزواج
حرة برضة
ترفض تمارسة بدون زواج
زي ما من حقها تفرط في عذريتها
في أي وقت
مع أي حد
من حقها برضه
تحتفظ بعذريتها
لوقت الزواج
تهديها لواحد بس
يستاهل
مش ده حقها برضه
الأمم المتحدة في إحدي وثائقها الخاصة بالمرأة قالت
من حق الفتاه أن تختار متي و كيف تبدأ حياتها الجنسية
جميل جدا
يعني من حقها تختار متي (أي بعد الزواج) و لا إيه
و من حقها تختار كيف (مع زوجها) اللي يستاهلها
حقها و لا مش حقها
الأمم المتحدة قالت لألألأ
مش حقها
تجريم الزواج المبكر
و لكن مستحب الجنس المبكر
ده رأي الأمم المتحدة
يعني جنس نعم
زواج لآلآلآلآلآلآلآ
الناس دي عايزة إيه بالظبط
مسطرتهم شكلها إيه
ده مش عداء للإسلام بس
ده عداء لكل الأديان و ألأخلاق
هي الحرية في نظركم يعني إيه
أنا حر أعمل اللي إنتوا عايزينه
و مش حر أعمل اللي أنا عايزة
لو إنتوا مش عايزينه
اللهم إني أسألك العفو و العافية
اللهم جنبنا الفتن
ما ظهر منها و ما بطن
آآآآآآآآآآآمين